ما حدش عارف ليه السيجارة سموها سيجارة لحد دلوقتى ؟
وما حدش مهتم يعرف..اللى بيحبوها وبيعشقوا ريحتها ودخانها وناسيين كل الدمار اللى بتعمله أهم حاجة عندهم انها تفضل فى جيوبهم وفى درج مكتبهم وجنب السرير بتاعهم ويمكن كمان على الحوض فى الحمام !
والناس اللى ربنا عفاهم منها مش محتاجين يعرفوا أى حاجة عنها خالص .. انا كمان مش عارف ليه اسمها سيجارة !
بس أنا اكتشفت شوية فوايد للسيجارة ..
آه بجد تصدقوا ان ليها شوية فوايد تخلى ناس كتير تتعشم تبقى من زباينها ركزوا وهاقول لكم على الفوايد دى . -
أولا السيجارة والتدخين هتديك الفرصة للتعرف على أصدقاء كتير ..وده لأن سعادتك كل يوم هتروح لدكتور جديد ! -
ثانى حاجة السيجارة هتوفر عليك حق البرفان ..ريحة السجاير مفيش أحسن منها مش كده برضه ! -
كمان السجاير هتوفر عليك تشترى ملابس رياضية لأنك مش هيبقى عندك نفس وهتبقى عدو الرياضة الأول ! - مش هتحتاج تركب نظام أمن وجرس انذار فى البيت .. كحة سعادتك طوال الليل هتخلى الحرامى يعتقد انك لسة صاحى ! - مش هتخاف على نفسك تقع وتتزحلق وانت ماشى ..العكاز بتاعك هيحميك من السقوط ! - الورثة بتوع سعادتك كمان مش هينتظروا كتير !...بعد كل الفوايد دى أكيد طبعا هتدخن وانت مرتاح البال ومفيش عندك أى مشكلة مع السجاير ويمكن كمان تقنع بيها اللى بيكرهوا السجاير .. مبسوط طبعا .. خليها تنفعك .وابقى قابلنى !
الأحد نوفمبر 09, 2008 4:35 am
